ကမ္ဘာတုထဲက မိန်းကလေး

ကမ္ဘာကြီးလုံးတယ်တဲ့
ဟုတ်ချင်လည်း ဟုတ်မှာပေါ့...
တစ်သက်လုံးတော့
စာတွေထဲမှာ ဒီလိုပဲ သင်ခဲ့ရတာကိုး...

ညာလက်ဆိုတာ
စာရေးဖို့နဲ့ ထမင်းစားဖို့တဲ့...
ဘယ်သူကစပြီး သတ်မှတ်ခဲ့တာလဲ
အမေက ဒီလိုပဲ သင်လာခဲ့တာကိုး...

နေ့ဆိုရင် နိုးထရမယ်
ညဆိုတာ အိပ်စက်ရမယ်...
ဘယ်သူ့ စည်းကမ်းတွေလဲ
တစ်လောကလုံးက ဒီလိုပဲ နေထိုင်ကျတာကိုး...

ဒီလိုပဲ နေထိုင်ကြတဲ့
ကမ္ဘာလောကကြီးမှာ
ဘယ်သူကစ၊ ဘယ်ကစ
မသိနိုင်တဲ့ အရာတွေ
ဒုနဲ့ဒေး ရှိနေကြသလို...
ရှေ့လူတွေရဲ့ လမ်းရိုး
စွဲကိုင်လိုက်လျှောက်နေတဲ့သူတွေလည်း
အများကြီးရှိနေသေးတယ်...

ပါးစပ်တွေက ပြောကြတယ်
ကိုယ့်အလုပ်ကိုယ်လုပ် တဲ့...
သူများအကြောင်း စိတ်မ၀င်စားနဲ့ တဲ့
တကယ်ရော ကိုယ်ကိုယ်တိုင်ဒီလိုပဲလား...

ဘ၀တစ်ခုကို
ကျားကွက်တွေလိုစဉ်းစား
တဖက်လူရဲ့အကွက်ကိုတွက်ချက်
အနိုင်အရှုံးတွေနဲ့ချာချာလည်
ဒါနဲ့ပဲ...
ကိုယ့်ကစားကွက်တွေ ပျောက်ဆုံးခဲ့ပေါ့...

ကိုယ့်လမ်းကိုယ်ဖောက်
ကိုယ့်လမ်းကိုယ်လျှောက်ကြရအောင်
"သူ့အတွေး" ဆိုတာကိုမေ့
ကိုယ့်အတွေးနဲ့ကိုယ်နေကြရအောင်...

တကယ်သတိထားမိရင်
ကိုယ့်လမ်းကိုယ်လျှောက်နေတာထက်
သူများခြေကိုလိုက်ကြည့်ရတာက
သိပ်ပင်ပန်းလွန်းနေပြီ...

ခက်တယ်ကွယ်...
ဒီကမ္ဘာတုထဲက မိန်းကလေး
အပြင်ကမ္ဘာကြီးအကြောင်း
နားမလည်သေးပါဘူး... တဲ့...

ဟုတ်တယ်လေ...
ကမ္ဘာတုထဲက မိန်းကလေးပါ
အပြင်ကမ္ဘာကြီးကိုမုန်းလို့
ဝေးဝေးနေတဲ့ မိန်းကလေးပါ...

ကမ္ဘာတုထဲမှာ
တွေးချင်ရာတွေ တွေးတယ်
ရေးချင်ရာတွေ ရေးတယ်
ဘယ်တွန်းအားမှ မရှိဘဲ
ကိုယ့်လမ်းကိုယ်သွားတယ်...

အပြင်ကမ္ဘာမှာလို
အတွန်းအတိုက်တွေမရှိဘူး
အနိုင်အရှုံးတွေမရှိဘူး
ဟန်ဆောင်ခြင်းတွေမရှိဘူး
ချစ်ခြင်းမုန်းခြင်းကြောင့် တွန်းအားတွေလည်းမရှိဘူး...

ကမ္ဘာအစစ်ကြီးကို မုန်းတဲ့ ကိုယ်
တွန်းအားတွေကို မုန်းတဲ့ ကိုယ်
အနိုင်အရှုံးတွေကို မုန်းတဲ့ ကိုယ်
ကုန်ကုန်ပြောရင်
အပြင်ကမ္ဘာက အရာအားလုံးကို မုန်းနေတဲ့ ကိုယ်...

အခန်းတံခါးတွေ အလုံပိတ်
လောကကြီးကိုမေ့ထားချင်လို့
တိတ်တိတ်လေးပဲ နေပါရစေ
တွန်းအားတွေမပါဘဲ
ကိုယ့်ခြေနဲ့ကိုယ် လှမ်းပါရစေ

"သူ"ဆိုတာတွေကို ဥပေက္ခာပြု
ကိုယ့်ပန်းတိုင်ကို ကိုယ်သွားပါရစေ
သန့်စင်တဲ့ မေတ္တာတရားအတွက်
အစွန်းအထင်းတွေ ဝေးပါရစေ

မုန်းလို့မဟုတ်တောင်
ချစ်ခြင်းရဲ့တွန်းအားမှာ
အနိုင်အရှုံးတွေနဲ့
တရွတ်တိုက်လိုက်ရတဲ့ ကိုယ်
ခန္ဓာကိုယ်လေး သိမ်ငယ်သေးကျုံ့
စိတ်အနာတရတွေ သိပ်များလွန်းလို့ပါ...။


လွမ်းသုရင်
၂၁ ဖေဖော်ဝါရီ ၂၀၁၀

[+/-] အပြည့်အစုံဖတ်ရန်...

[+/-]ပြန်ခေါက်ရန်...

လွမ်း...

လွမ်းတတ်သူပါကွယ်
လွမ်းတတ်သူ ဒီရင်ထဲဝယ်
အလွမ်းလေးတွေ
ပန်းလိုသီထားမယ်...

လွမ်းတတ်သူကိုမှ
လွမ်းရအောင် သူဖန်လို့ကွယ်
ကံကြမ္မာရယ်
ပြုစားရက်အားတယ်...

လွမ်းသလားသူဆို
လွမ်းသမျှတော့ သူမသိစေလို
ကိုယ့်မျက်ရည်ကြောင့်
သူနွမ်းမှာစိုးသကို...

လွမ်းသမျှလည်း ရင်ထဲမှာပဲ
လွမ်းရက်ရှည်လည်း ကြုံဦးမှာမလွဲ
နှလုံးသားလေးလည်း
ငိုနေဦးမှာ အမြဲ...

လွမ်းသုရင်
၁၁ ဖေဖော်ဝါရီ ၂၀၁၀

[+/-] အပြည့်အစုံဖတ်ရန်...

[+/-]ပြန်ခေါက်ရန်...

ဆန္ဒ

နှလုံးသားနဲ့ ဦးဏှောက် လွန်ဆွဲတဲ့အခါ
မျက်ရည်တို့က ဓါးစားခံဖြစ်ရတယ်ပေါ့...

ဦးဏှောက်ရဲ့ ဆုံးဖြတ်ချက်ဟာ
တည်တံ့ခိုင်မြဲတယ် ဆိုပေမယ့်
နှလုံးသားရဲ့ ဆုံးဖြတ်ချက်ကိုပဲ
ဦးစားပေးချင်တာ သဘာဝပေါ့...

ဘာကြောင့်လဲ...
ကံတရားလို့ပဲ ဆိုဆို
ဝဋ်ကြွေးလို့ပဲ ပြောပြော
ဦးဏှောက်မရှိဘူးလို့ပဲ ထင်ထင်
နောက်ဆုံးအချိန်ထိတော့
နှလုံးသားရဲ့ ဆုံးဖြတ်ချက်ကို
ကြားနာချင်မိပါသေးတယ်

ကြားနာချင်မိပါသေးတယ်...

လွမ်းသုရင်
၉ ဖေဖော်ဝါရီ ၂၀၁၀

[+/-] အပြည့်အစုံဖတ်ရန်...

[+/-]ပြန်ခေါက်ရန်...