ပြေးချင်သူ

ပြေးချင်သူ

"အချိန်တန်ဂိမ္မာန်နွေဦးးးဝယ်..မသွေအမှန်တောင်ပြန်လေမြူးးးတယ်... အချိန်ခါဝေဆာပွင့်အလှထူးးတဲ့..အိုပိတောက်ဦးးးရယ်.."

အချိန်တန်လို့တန်မှန်း မသိနိုင်တဲ့ဘဝတစ်ခုကို ဘာကြောင့်များ ပြုစားချင်ရသလဲ...နွေ...။
ဆွံ့အနေတဲ့နှုတ်ခမ်းတစ်စုံနဲ့တော့ မင်းအလှကို မရွတ်ပါရစေနဲ့ ...နွေ... ရယ်။

ငါ့ရင်မှာလေ...
ကသုတ်ကရက် တိုက်လာတတ်တဲ့ လေရူးတွေရယ်၊ တိမ်းမူးတက်မက်ဖွယ်ကောင်းတဲ့ ရိုးတံကျဲကျဲ ပင်အိုကြီးတွေရယ်၊

နုပျိုလတ်ဆတ်နေတတ်တဲ့ တမာရနံ့သင်းသင်းရယ်၊ အလှချင်းပြိုင်နေတတ်တဲ့ နီတျာတျာစိန်ပန်းနဲ့ ငုပန်းပွင့်ဝါဝါလေးတွေရယ်၊

တစ်ခါတစ်ခါ တီတျာခွန်းချို တေးသံလိုနဲ့ ရင်ဖြိုတေးသွား သီရက်အားတဲ့ ဥသြငှက်ငယ်လေးတွေရယ်က တစ်စတစ်စနဲ့ နေရာယူလာကြပြီ ...နွေ...။

ဒါကြောင့်လဲ.. အတာရေအေးအေးရယ်၊ ထုံနေအောင်မွှေးတဲ့ ပိတောက်ရယ်၊ အင်းယားလမ်းတစ်လျောက်က မဏ္ဍပ်တွေရယ်ကို သံယောဇဉ်ငတ်နေတဲ့ ဒီရင်ဘတ်ကြီးနဲ့သာ ပက်ပက်စက်စက်လွမ်းနေမိပါရဲ့...နွေ...ရယ်။

မုန့်လုံးရေပေါ်ဖြူဖြူလေးတွေ...၊အုန်းနို့ရနံ့သင်းနေတဲ့ ကောက်ညှင်းပေါင်းဖွေးဖွေးလေးတွေ...၊
မုန့်လက်ဆောင်းအေးအေးနဲ့ ကျောက်ကျောရောင်စုံငယ်လေးတွေ...၊
မြန်မာမြေက မေမေချက်တဲ့ သင်္ကြန်ထမင်း၊
မြေသင်းရနံ့ဖန်ဆင်းရှင် သင်္ကြန်မိုးရေ..ပြီးတော့...တန်ခူးလေ...

မြတ်နိုးသောမြေ အတာရေနှင့်၊
တောင်လေလွင့်မြူး ကံ့ကော်ဦးနှင့်၊
ပျော်မြူးလိပ်ပြာ ရော်ရွက်ဝါတို့ ရင်နာလျက်ဝေးးး...ကျွန်တော်...ဆွေးရပေဦးတော့မယ်နွေ...။

ပင့်သက်တွေရှိုက် ရင်တွင်လှိုက်မော ဖြစ်သည့်သောက ပြင်းလွန်းလှပါတယ်...နွေ...။
ကျွန်တော် ခဏ နားပါရစေတော့....

(အလွမ်းရစ်သမ်တွေနဲ့ ပြည်တော်ပြန်တေးကို
တစ်ရေးနိုးတိုင်း ထထရေး၊
အိပ်မက်တွေနဲ့ဝေးရာကိုပြေးချင်သူ...)

စေစားသူ

...............

မနှစ်က ကဗျာကိုလွမ်းတဲ့ အတာ... ဒီနှစ်တော့ သူဟာ "ပြေးချင်သူ" တစ်ယောက် ဖြစ်ရတယ်။ တကယ်တော့ ကျွန်မကပဲ သူ့ကို ပြေးဖို့အဖော်ညှိခဲ့တာ။ ဒါပေမယ့် ခုချိန်ထိ ကျွန်မက ပြေးဖို့ခြေလှမ်းပြင်နေတုန်း... သူကတော့ ပြေးသွားခဲ့တာ စာရွက်ပေါ်ကို စကားလုံးတွေ စီလို့...။

ဘာပဲဖြစ်ဖြစ် ဒီနှစ်အတွက် ကျွန်မဟာ ပိတောက်ပန်းကို ခုထိမမြင်ရသေးပါဘူး။ ဘလော့ခ်တွေပေါ်မှာ သင်္ကြန်အကြောင်းတွေ ဖတ်နေရပေမယ့် လွမ်းမိတယ် ဆိုရုံလောက်ပဲ ခံစားမိတယ်။ အရင်က ကိုယ်ရေးခဲ့တာတွေ ပြန်ဖတ်မိလည်း အသစ်ပြန်မဖြစ်လာ။ ဒီကိုရောက်ကတည်းက သင်္ကြန်တွေကို ပြန်စဉ်းစားမိတယ်။ အရင်သုံးနှစ်ကထက် စတုထ္ထနှစ်မြောက် သင်္ကြန်ဟာ ကျွန်မအတွက် တော်တော်ကို အေးစက်တယ်လို့ ပြောရမယ်။

မနှစ်ကသင်္ကြန်နားနီးတော့ မအိန္ဒြာအိမ်မှာ မုန့်သွားစားတာကို သတိရတယ်။ "အချိန်တန် ဂိမ္မာန်နွေဦးးးဝယ်.." ဆိုတဲ့ အသံကြားတာနဲ့ သင်္ကြန်ပိုးတွေ အလိုလိုနိုးကြားလာတယ်လို့ ပြောတဲ့ Black Dreamတစ်ယောက် ဘလော့ခ်မှာတင်ထားတဲ့ သီချင်းကို Replay လုပ်ပြီးနားထောင်တာကိုလည်း သတိရတယ်။ ဘလော့ခ်ဘန်နာကိုမြင်တိုင်း သက်ပိုင်သူကိုလည်း သတိရတယ်။ အွန်လိုင်းကနေ ရေတွေလောင်းပြီး စကြတာကိုလည်း လွမ်းတယ်။ နှစ်ဆန်းတစ်ရက်နေ့မှာ အိမ်ပြန်ရတော့မှာမို့ ပျော်နေတဲ့စိတ်တစ်ပိုင်းတစ်စနဲ့ ဘလော့ခ်အတွက်လည်း စာတွေကြိုရေးပြီး Schedule နဲ့ တင်ဖြစ်ခဲ့တာတွေကိုလည်း သတိရနေတယ်။

ခုတော့လည်း အနေဝေးလို့ပဲ သွေးအေးသွားသလား သင်္ကြန်ရယ်။ ပိတောက်ရနံ့ပဲ ဝေးသွားလို့လား။ ဒါပေမယ့် နွေအလှ ရဲ့ သံစဉ်တွေ ကြားယောင်လာရင်တော့ သင်္ကြန်ကို လွမ်းတဲ့စိတ်တွေဟာ နိုးထအသက်ဝင်လာလိမ့်မယ်လို့ မျှော်လင့်မိပါတယ်။ တကယ်လည်း နိုးထချင်မိပါတယ်...။ ပိတောက်ရနံ့သင်းသင်းနဲ့ သင်္ကြန်ရေတွေစိုနေတဲ့ အင်တာနက်ထဲကသင်္ကြန်၊ အိပ်မက်ထဲကသင်္ကြန်ကနေ နေခြစ်ခြစ်တောက် ပူပေမယ့် ရေစိုစိုမှာ အပြုံးမပျက်၊ မြို့လုံးပတ်ခဲ့တဲ့ လက်တွေ့ဘ၀ထဲက သင်္ကြန်ဆီကိုလေ...။