" ခွဲခွာကြတဲ့အခါ ကျန်ရစ်သူက ပိုပြီး လွမ်းရတယ်ဆိုတဲ့ စကားဟာ ငါ့အတွက်တော့ မှားတယ်။ "
................
" မနက်စောစော ဘုရားတက်ပြီးမှ ငါတို့သွားကြတာပေါ့ သူငယ်ချင်း"
ရွှေတိဂုံဘုရားနှင့် နီးနေသည်မို့ သူမစိတ်က ဘုရားအရင်တက်ဖို့ ဆန္ဒရှိနေသည်။ အကြောင်း ထွေထွေထူးထူးတော့ မရှိခဲ့ပါ။ ဘယ်အချိန်မဆို သူ့အတွက် အံ့အားသင့်သွားစေဖို့ ရည်ရွယ်မိတတ်တာဟာ သူမရဲ့ အကျင့်တစ်ခုလို ဖြစ်နေခဲ့ပြီလေ။ သူရှိတဲ့နေရာ၊ သူသွားတတ်တဲ့နေရာ၊ သူ့ခြေရာထင်ကျန်ခဲ့ရာ ဒေသတိုင်းမှာ သူမအရိပ်သည်လည်း ထင်ကျန်နေစေချင်သည်က သူမ၏ ဆန္ဒ။
စိမ်း ဆိုသည့် သူငယ်ချင်းမလေးတစ်ယောက် မငြီးမညူ သူမဘေးက ထပ်ကြပ်မကွာ လိုက်ပါလာခဲ့သည်။ တကယ်တော့ စိမ်း သည်လည်း သူမ၏အရိပ်တစ်ခုဆိုလျှင် မှားမည်မထင်။ သူမခြေရာထင်ကျန်ရာ နေရာအားလုံးတွင် စိမ်းဆိုသည့် ကောင်မလေးတစ်ယောက်၏ ခြေရာတွေလည်း ထင်နေလိမ့်မည်။ နေပူပူ မိုးရွာရွာ၊ ရာသီမရွေး သူမအတွက် အမြဲအဆင်သင့် ရှိနေတတ်သည့် သူငယ်ချင်းဟာ စိမ်း တစ်ယောက်တည်းပါ။
" ဘုရားပေါ်ကတော့ ဆင်းလာတာဟုတ်တယ်။ ငါတို့ဘယ်လို ဆက်သွားကြမှာလဲ။ ငါက ကားနဲ့ပဲ ဖြတ်သွားဖူးတာနော်။ နင်သွားတတ်လား။ "
တစ်ခါမှ သေသေချာချာ မသွားဖူးသည့် နေရာမို့ စိမ်းက စိတ်ပူနေသည်။ တကယ်တော့ သူမလည်း တစ်ခါမှသွားခဲ့ဖူးသည် မဟုတ်ပါ။ စိတ်တစ်ခုတည်းနှင့်သာ အရောက်လာခဲ့ခြင်း ဖြစ်သည်။ သူမခံယူချက်က "ပါးစပ်ပါရင် ရွာရောက်တယ်" တဲ့လေ။
" ငါလည်း သွားတော့ဘယ်သွားဖူးမလဲ။ ဘယ်ကနေသွားရင် ဘယ်ကိုရောက်တယ် ဆိုတာမျိုးပဲ ငါက ကြားဖူးနားဝရှိနေတာ။ နင်ကလည်း ပူမနေပါနဲ့။ ငါတစ်ယောက်လုံးပါတယ်။ မတွေ့ရင် တက္ကဆီစီးသွားမယ်။ "
စိုးရမ်နေသည့် စိမ်းကို ဖျောင်းဖျရင်း ခေါင်းထဲမှာလည်း လမ်းရှာရင်း ဖြည်းဖြည်းလျှောက်လာခဲ့ရာ ဆိုင်းဘုတ်တစ်ခုကို တွေ့သည့်အတွက် သူမအားတက်သွားသည်။
"ဟဲ့ ဇီဝကလမ်းတဲ့။ ဒီလမ်းပဲ။ ဒီလမ်းထဲကနေ ဖြတ်လျှောက်ရင် ရောက်တယ်။ လာ လာ "
" ဟုတ်ရဲ့လား။ သေချာတယ်နော်။ ငါက မျက်စိလည်တတ်တယ်။ "
" သြော်.. သေချာပါတယ်ဆို "
ပြောပြောဆိုဆို စိမ်းလက်ကိုဆွဲကာ ဇီဝကလမ်းထဲ လျှောက်လာခဲ့ရာ စိမ်းလည်း သူမနောက်က မရဲတရဲနှင့် လိုက်ပါလာခဲ့သည်။ လမ်းတစ်လျှောက်လုံး တွေ့ရသည်က တိုက်တန်းလျားတွေ...။
လမ်းတစ်ဝက်ကျော်ကျော် လျှောက်မိသည်အထိ ဘာမှမထူးခြားသည့်အခါ စိမ်းဆိုသည့် မိန်းကလေးက စိတ်ပူလာပြန်သည်။
" ဟဲ့ တစ်ယောက်ယောက်ကို မေးကြည့်ရင် ကောင်းမယ်နော်။ တိုက်တွေပဲ ရှိတယ်ဆိုတော့... "
ဘာပဲဖြစ်ဖြစ် မေးကြည့်တာ အရှုံးမရှိပါဘူးဟု ဆုံးဖြတ်ကာ ဖြတ်သွားဖြတ်လာတစ်ယောက်ကို မေးမြန်းကြည့်တော့ သူမတို့လျှောက်လာသည့်လမ်း မမှားကြောင်း အတည်ပြုနိုင်ခဲ့သည်။
"တွေ့လား။ ငါပြောသားပဲ။ ဒီလမ်းမှန်ပါတယ်လို့။ ဒီလမ်းဆုံးရင် ဦးဝိစာရလမ်းကိုတွေ့မယ်။ လမ်းကူးလိုက်ရင် ရောက်ပြီတဲ့။ "
မနက် ၁၀နာရီနီးနီးရှိနေပြီမို့ နေကတော့ အတော်အသင့် ပူနေပြီဖြစ်သည်။ သူမကသာ ဇောနှင့်မမောနိုင်ပေမယ့် ဆံစပ်မှချွေးစို့စို့လေးတွေကို တစ်ရှူးနှင့် သာသာလေးသုတ်နေသော စိမ်းကိုတော့ သနားမိသေးသည်။ သူ့ခမျာ သူငယ်ချင်းကို ချစ်လို့သာ ထပ်ကြပ်မကွာလိုက်ပါခဲ့သည်လေ။ တကယ်ဆိုရင် ဒီလမ်းအကွာအဝေးအရ တက္ကစီငှားခဲ့ဖို့ကောင်းသည်။ ခုတော့ လမ်းတစ်ဝက်ရောက်နေပြီမို့ မထူးတော့ပြီ။ နောက်ထပ် မိနစ်နှစ်ဆယ်လောက် ဆက်လျှောက်ရဦးမည်တဲ့...။
" ဟဲ့ ရောက်နေပြီ။ ဒါ နောက်ကျောဖြစ်မယ်။ အပေါက်ကို ရှာကြည့်ရအောင်။ "
ဇီဝကလမ်းအဆုံး ကန့်လန့်ဖြတ်နေသော ဦးဝိစာရလမ်းကို ဖြတ်ကူးအပြီး အုတ်ပန်းကွက်တံတိုင်းအတွင်းဘက်ကို ချောင်းကြည့်ရင်း စိမ်းတစ်ယောက် သူမကို အကြံပေးနေသည်။
" အေးဟ ... နောက်ပေါက်တော့ ရှိမယ်ထင်ပါတယ်။ အုတ်တံတိုင်းအတိုင်း လျှောက်ကြည့်တာပေါ့ "
ဒီလိုနဲ့ သူငယ်ချင်းနှစ်ယောက် ဆက်လျှောက်မိကြပြန်တော့ တစ်နေရာမှာ လူဝင်ပေါက်သဖွယ် တံခါးပေါက်တစ်ခုကိုတွေ့ရပြီး အပေါက်စောင့် ၀န်ထမ်း ၂ ယောက်ရှိနေသည်မို့ စုံစမ်းကြည့်မိပြန်သည်။
" ဒါ အမှတ် (၂)ဆေးရုံလား အစ်ကို။ ဂိတ်ပေါက်က ဘယ်နားမှာလဲဟင်။ "
နေပူပူမှာ ကြိုးစားပမ်းစား အဝေးကြီးလမ်းလျှောက်လာသည့် မိန်းကလေးနှစ်ယောက်ကို ဂိတ်ပေါက်စောင့်ကပဲ သနားသွားသည်လားမသိ။ အပြင်လူမ၀င်ရဆိုသည့် ဦးဝိစာရလမ်းနောက်ပေါက်မှ သူမတို့နှစ်ယောက်ကို ၀င်ခွင့်ပေးခဲ့သည်။ အမှန်တကယ်ဂိတ်ပေါက်က မြို့မကျောင်းလမ်းဘက်မှ ပတ်ပြီးဝင်ရမည်ဖြစ်သည်။ ဆေးရုံဝင်းထဲရောက်တော့ တစ်ယောက်မျက်နှာတစ်ယောက်ကြည့်ပြီး သဘောကျနေကြသေးသည်။ ဦးတည်ရာသို့ ရောက်ခဲ့ပြီလေ။ နောက်ဆုံးပစ်မှတ်တစ်ခုသာ ကျန်တော့သည် မဟုတ်လား။
ဆေးရုံဝင်းထဲမှာ အရင်ဆုံးတွေ့ရသည်က ဆေးရုံနောက်ဘက်ရှိ ကန်တင်းတွေ။ နောက်တော့ ဆရာဝန်ကြီး ရုံးခန်းတွေ။ တွေ့သမျှ မြင်သမျှ ဟိုဟိုသည်သည်လျှောက်ကြည့်မိသည်။ ဂျူတီကုတ်ကိုယ်စီနှင့် နားကြပ်လေးတွေလည်ပင်းမှာချိတ်လို့ သွားလာလှုပ်ရှားနေကြသည့် ဆေးရုံဝင်းထဲမှာ၊ အဆောင်တွေမှာ တွေ့လိုတွေ့ငြား ရှာကြည့်မိနေသေးသည်။ သို့သော်လည်း မြင်မြင်သမျှ ခပ်ဆင်ဆင်တူသလိုသာ။ သူတော့ မဟုတ်ခဲ့ပါ။ နောက်ဆုံးတော့ အနားမှဖြတ်လျှောက်သွားသော ဂျူတီကုတ်အဖြူရောင်လေးနှင့် အလုပ်သင်ဟုထင်ရသော တစ်ယောက်ကို မရဲတရဲမေးကြည့်မိသည်။
" ဒေါက်တာ... ဟိုလေ ဒီဆေးရုံမှာ အလုပ်သင်ဆင်းနေတဲ့ ဒေါက်တာxxx ကိုများသိပါသလား "
ကံတရားက သူမကိုမျက်နှာသာပေးခဲ့သည်ဟုပင် ဆိုရမည်။ မေးမိသည့် အလုပ်သင်ဆရာဝန်မှာ တိုက်တိုက်ဆိုင်ဆိုင် သူ့သူငယ်ချင်းဖြစ်နေသည့်အတွက် ဘယ်နေရာမှာရှိမည်ကို တိတိကျကျသိခဲ့ရသည်။ ထိုဆရာဝန်လေးညွှန်သည့်အတိုင်း သေချာလျှောက်အလာ အဆောင်ထောင့်ချိုးတစ်ခုအရောက် သူမ ခြေလှမ်းများ တုန့်ခနဲ ရပ်တန့်သွားရတော့သည်။
ပြောင်နေအောင် တိုက်ထားသည့် ရှူးဖိနပ်အနက်ရောင် ဦးချွန်က နေရောင်မှာ တလက်လက်။ လက်တံတောင်ဆစ်ထိ ခေါက်တင်ထားသည့် ဂျူတီကုတ်အဖြူရောင်နှင့် သူ၊ သူတကာတွေလိုပင် နားကြပ်ကို လည်ပင်းမှာ ခွေချိတ်ထားပေမယ့် သူမအမြင်အာရုံထဲမှာတော့ တမူဆန်းပြီး ကြည့်ကောင်းလို့နေသူပါ။ သွယ်ဆက်တော့မည့်အလား ထိလုလု မျက်ခုံးနက် နှစ်ဖက်တို့ကိုစုပြီး မျက်မှောင်ကုတ်ကြည့်တတ်သည့် မျက်ဆံစူးစူးတို့ကို သူမခံနိုင်ရည် ဘယ်တုန်းကမျှ မရှိခဲ့တာ သူသိခဲ့ဖို့ ကောင်းပါသည်။
" နင် ဘယ်လိုရောက်လာတာလဲ။ "
သူမရဲ့ စိတ်၊ သူမရဲ့ အပြုအမူတွေကို အသားကျရင်းနှီးပြီးသားဖြစ်သည့် သူ့မျက်လုံးမှာ ကျေနပ်သည့်အပြုံးတွေ၊ မျက်နှာပြင်ပေါ်မှာ ပျော်ရွှင်လှိုက်လှဲသည့် အပြုံးတွေ...။ အဲ့ဒီအပြုံးတွေကို သိပ်စွဲလမ်းမိခဲ့လို့၊ အဲ့ဒီအပြုံးလေးတစ်ခုကို တွေ့ရဖို့ ဘယ်သူမှ မထင်မှတ်လောက်အောင် အပင်ပမ်းခံ မိုက်မဲခဲ့တဲ့ မိန်းမတစ်ယောက် ရှိခဲ့တယ်ဆိုရင် သူ ယုံမှ ယုံပါ့မလား။ တော်ရုံတန်ရုံ မိန်းမတစ်ယောက် မစွန့်စားတတ်တဲ့ စွန့်စားမှုတွေရှိခဲ့တယ်ဆိုရင်ရော သူ ဘယ်လိုများ မှတ်ချက်ပေးဦးမှာလဲ။ " နင့်ကိုငါ ဘယ်တုန်းက ရှောင်ပြေးလို့ရခဲ့ဖူးလို့လဲ၊ ငါ့ခြေလှမ်းတွေကို နင်ဟာ သိနှင့်နေသူပါ" ဆိုတဲ့ စကားကို သူ ထပ်ပြောလိမ့်ဦးမည်။ အဲ့ဒီစကားရဲ့ နောက်ကွယ်က ယောက်ျားတစ်ယောက်ရဲ့ အတွင်းစိတ်ကို နားမလည်ခဲ့ခြင်းသည် သူမ၏ ညံ့ဖျင်းမှုသာ ဖြစ်ပါလိမ့်မည်။
"အင်ကြင်းစံ" ဆိုသည့် ကန်တင်းလေးကတော့ နေ့တစ်ဝက်လုံး Ward ထဲပြန်မသွားခဲ့ပဲ ဧည့်ခံနေသည့် အလုပ်သင်ဆရာဝန်လေးတစ်ယောက်ကိုပဲ အပြစ်တင်နေသလား၊ အလုပ်ချိန်နှောင့်ယှက်မှုဖြင့်ပဲ ဧည့်သည်မိန်းကလေး နှစ်ယောက်အား မကျေမနပ်ဖြစ်နေသလား သူမ ဂရုမပြုမိခဲ့ပါ။ သူမအတွက်တော့ ထိုနေ့က အောင်နိုင်သူတစ်ယောက်ရဲ့ ပီတိတွေနဲ့အတူ ရူးသွပ်စေတဲ့ နှုတ်ခမ်းရဲရဲတစ်စုံမှာ နစ်မျောနေခဲ့တယ်လေ။
............
အချိန်တွေဟောင်းလာခဲ့သလို အရွယ်တွေလည်း ပြောင်းခဲ့ပြီ။ ဘယ်အနေအထားရောက်ရောက် "သူငယ်ချင်း" ဆိုသည့် သံယောဇဉ်ကြိုးတစ်ချောင်းကတော့ တွယ်ရစ်နှောင်ဆဲ။ ခြေရာထင်ကျန်ရစ်ဖူးသည့် နေရာတွေနှင့် တစ်လက်မမျှ နီးစပ်ခြင်းမရှိသည့်တိုင်အောင် ရုပ်ရှင်တစ်ကားလို ပြန်လည်မြင်ယောင်နေဆဲ။ မတော်တဆ ပျောက်ပျက်ခဲ့လို့ပဲ ဖြစ်ဖြစ်၊ ရည်ရွယ်ပြီး ဖျောက်ဖျက်ခဲ့လို့ပဲ ဖြစ်ဖြစ် တစ်ချိန်တုန်းက ပိုင်ဆိုင်ခဲ့ဖူးတယ်ဆိုတာကတော့ အမှန်။ ပိုင်ဆိုင်ခဲ့ဖူးတဲ့ အတိတ်တစ်ချိန်ကို မြတ်မြတ်နိုးနိုး ဖြူဖြူစင်စင် တမ်းတမိဆဲ။ "အင်ကြင်းစံ ရှေ့ကဖြတ်တိုင်း နင့်ကို ငါအမြဲ သတိရနေတယ် " ဆိုသည့် စိမ်း ရဲ့ စာလေးတွေကို ဖတ်ရတိုင်း သူမနာကျင်နေရဆဲ...။
"ကျန်ရစ်သူပဲ ဖြစ်ဖြစ်၊ ထွက်ခွာသူပဲ ဖြစ်ဖြစ်၊ စိတ်နဲ့ရင်းခဲ့သူဟာ ပိုပြီးလွမ်းရ ခံစားရတယ်ဆိုတာကို နင်သိအောင် ဘယ်လိုပြောရပါ့မလဲ သူငယ်ချင်းရယ်...။"
လွမ်းသုရင်
၉ သြဂုတ် ၂၀၁၀
.jpg)
Posts
